माणसं मनातली

मोगऱ्याचं फूल ओंजळीत घेतलं की त्याचा गंध मनाला , शरीराला प्रसन्न करून जातो. सहवासातील माणसाचं देखील असंच असतं. काही माणसं काही क्षणातच मनाला खूप आवडतात , आपली होऊन जातात. तर , काही कितीही सहवासात राहिली , तरी त्यांची आतून ओढ नसतेच. चेहरा बघण्यापेक्षा नेहमीच समोरच्याच्या मनात उतरून बघावं. शोधूनही तिथं माणूसपण सापडत नसेल , तर त्याचं सुंदर दिसणंही मग किळसवाणं वाटतं. शरीराची सुंदरता वया बरोबर संपते , तर मनाची सुंदरता शेवटपर्यंत टिकून राहाते. शरीराला वय असतं , मनाला ते कधीच नसतं. शेवटी काय , आपण व्यक्तीच्या स्वभावाच्या प्रेमात असतो , शरीर तर निमित्त मात्र असतं. माणसाच्या स्वभावात गोडवा , शालीनता , प्रामाणिकपणा , आणि विनयशीलता असेल , तर त्याची काही क्षण जरी सोबत मिळाली तरी ती हवीहवीशी वाटते. म्हणूनच बाहेर लक्ष दिव्याची सुंदर आरास असूनही , देवघरातील समईच्या तेजापुढं आपण नतमस्तक होतो. आयुष्यात अशी माणसं कधी भेटली तर त्यांच्यावर जीवापाड प्रेम करावं ! आपल्या आवडत्या माणसाचं आपल्या सोबत असणं, ही आयुष्यातील सगळ्यात मोठी कमाई. ती प्रत्येकाच्या वाट्याला येतेच असं नाही. आजकाल अशी माणसं भेटतात तरी कुठे ? नशिबानं कधी भेटलीच तर हळुवार जतन करून ठेवावीत. कदाचित , पुन्हा भेटतील , न भेटतील ?

●●●●●●●

मनाप्रमाणे एखादी गोष्ट घडली की आपण आनंदी होतो, विरोधात घडली की दु:खी होतो आणि स्वत:विषयीच नाराज होतो. पण आयुष्य हे असेच असते. सुख दु:खाचे हेलकावे घेतच चालावे लागते. आकाशात जेव्हा ऊन आणि पावसाचा संघर्ष असतो, तेव्हाच इंद्रधनुष्य तयार होते. आयुष्य सजवायचे असते ते अशा इंद्रधनुष्यांनी. तडजोडीमुळे नुकसान होत नाही, तर संधी मिळते, इंद्रधनुष्य फुलवण्याची...!

●●●●●●

माणसाच्या परिचयाची सुरूवात जरी चेहर्‍याने होत असली तरी, त्याची संपूर्ण ओळख वाणी, विचार आणि कर्मांनीच होते. कोणी आपल्याला वाईट म्हटलं तर फारसं मनावर घेऊ नये कारण, या जगात असा कोणीच नाही ज्याला सगळे चांगलं म्हणतील.

●●●●●●●●

एक तंबाखू बहाद्दर आणि दारुडा दोघेही, मोटीव्हेशनच्या व्यवसायात आले!..

पहिला म्हणाला,'ज्ञानाच्या तंबाखूवर, विचारांचा चुना मळून, त्याला कर्माच्या तळहातावर, परिश्रमाच्या बोटांनी आपटल्यास, यशाची सुंदर पिचकारी मारता येते!'

दुसऱ्याने उत्तर दिले,'बुद्धीच्या बाटलीतून, सुविचारांचे मद्य, कृतीच्या पेल्यात ओतून, त्यासोबत दृढनिश्चयरुपी चखन्याचा आस्वाद घेतला असता, यशाची सुंदर झिंग आपोआप चढते!'

😅😂🤣😅😂🤣😅😂🤣😅😂

*संकलन-मच्छिंद्र ऐनापुरे, जत जि. सांगली*

🐜🐜🐜🐜🐜🐜🐜🐜🐜🐜🐜