स्कंदपुराणात या देवीच्या रुपाविषयी उल्लेख आढळतो. तो असा- 'रत्नपुरी' नामक नगरीतील 'महिषासुर' या बलाढ्य दैत्याने आपल्या घोर तपश्चर्येने ब्रम्ह देवास प्रसन्न करून घेतले आणि देव,गंधर्व वा मानवाकडून आपणास मृत्यू येऊ नये , असा वर मागितला. ब्रह्मदेवाने'तथास्तु' म्हटले खरे ,परंतु त्यामुळे महिषासुर उन्मत होऊन सर्व देवादिकांना उपद्रव देऊ लागला. एकदा त्याचा मंत्री धूमकेतू व नारदमुनी यांची भेट झाली असता ,त्यांनी आर्याद्विपावरील 'आर्यादुर्गा' नामक अतिसुंदर ललनेविषयी माहिती दिली. ही माहिती धूमकेतूद्वारा महिषासुरापर्यंत गेली तेव्हा तो खूश झाला. त्याने धूमकेतूलाच मोठा नजराणा देऊन त्या स्त्री रत्नाला आणण्याची आज्ञा केली. देवीसमोर नजराणा अर्पण करून धूमकेतूने महिषासुराचा मानस कथन करून रत्नपुरीत येण्याविषयी विनवले. 'जो माझ्याशी युद्ध करून जिंकेल त्याचा मी पती म्हणून स्वीकार करीन ' या अटीवर देवी तयार झाली. या गोष्टीचा धूमकेतूलाच इतका गर्व झाला की तोच देवीचे हरण करण्यास सरसावला. तेव्हा देवीच्या एका दासीने त्वरित त्याचा शिरच्छेद केला.
आज अंकोला येथील श्री आर्यादुर्गा देवस्थान शांत व रम्य परिसरात वसल्याने भाविकांचे मन मोहित करते. सुवर्ण छटांनी सुशोभित भव्य सभागृहातून आत गेल्यावर दोन्ही बाजूच्या प्रचंड समयांमधील मंद प्रकाशात देवीची अलंकृत मूर्ती विलोभनीय दिसते. तिच्या हातातील ढाल व तलवार ही शस्त्रे भक्तांच्या रक्षणार्थ सज्ज झालेली दिसतात. सभोवतालची चांदीची अलंकृत प्रभावळ व गाभाऱ्याच्या चौपाटीवरील नक्षीकाम तिच्या सौंदर्यात भर टाकते. देवीचे पूजाविधी येथील क्षेत्रो पाध्यामार्फत केले जातात.
No comments:
Post a Comment